अधुना ओपरी (सेखावत सुमेरसिंह सरवडी )

मुरधर री मरवण ,
पूंगल री पदमण ,
अणखै जुग आखो ,
अपरोघे थारै
नटणी सै नवलै साँग  नै ,
घूँघट बिन सूनी माँग नै  !

माँडेची  मूमल ,
जेसाणी सूमल ,
कीकर तो कोई थने ओलखै -
सडकां पै फिरती ,
मछली सी तिरती -
अणचीतै अधुना भेस में ,
मारू देस में ?

मनडै री मनणा ,
रामू री चनणा ,
तितली बण बैठी ,
बँगलां रै जँगलां आज तूं !
बातां री बीणत ,
ख्यातां री कीरत ,
अब कियाँ पिछाणे
फुटरापो थारो पाछलो ,
सुंदर सांचलो !            

सुगणी घण साभळ
खीवै री आभळ ,
बदल्यो जुग , बदळी लार तूं !
नगरां री नारी ,
अबल़ा सिणगारी ,
कद कठे कटाई
या वेणी वासग नाग सी ,
कजळी बाग सी ?

महिला मरदानी ,
बूची बचकानी ,
फुटपाथां हाँडै गूंगी बावळी ,
गोरी सांवली  ?

गज गामण गजबण ,
लजवंती लजवण ,
सुवटै री मैना ,
बीरा री बै'ना ,
कवियां न लागे अधुना ओपरी ,
सोनल ,छोकरी !