ओ भारत रा खेतरपालो

ओ भारत रा खेतरपालो
होस संभालो -सींव रुखालो 
(सुमेरसिंघजी सरवडी )


राजघाट रा सूत कतारों
सत्य अहिंसा रा हलकारो !
सस्तर सोधो - बख्तर धारो
हर हर महादेव उच्चारो !
मोल चुकावण नै सुराज रो
माथा माँगे आज हिंवालो !

जाचक री झोली नै फेंको ,
सेल अणया सू बाटी सेको !
  खरी मजूरी रा पग टेको
छोड़ हजूरी रो ठग ठेकों !
नितर पिढ्या भूक मरैली
मस्तक-तिलक लगैलो काल़ो !

दुरसीसां रा घाव न लागे ,
हाका करया न बैरी भागे !
बळ बुध दोनूं ज्यांरै सागै
नमै जमानो वारे आगे !
प्राणा रा बागी बण जूझो
सिर आई विपदा नै टाल़ो !

वीर सिवा रा सूर सपूतो
राजस्थान तणा रजपूतो !
रण पथ रा जोगी अवधूतो ,
मात भोम रा सिंघ -प्रसूतो !
जठे-जठे पापी पग मेलै  
रगत -पनालां इल़ा पखालो !

भुज बळ रै जनमत नै टेरो
गौरव री गीता नै हेरो !
मरजादा रा भाव अटेरो
पुरसारथ रा कटक उछेरो !
कळजुगी रै दुसमी रावण री
उतराधि लंका नै बालो !