मनीषी स्व . सुरजन सिंह सेखावत
लेखक : रघुनाथ सिंह काली पहाड़ी ( जागती जोत जुलाई'१९९९ )
राजस्थानी साहित अर इतिहास रा लूंठा लेखक, राजस्थानी भासा रा हिमायती मानिता सुरजन सिंघजी रो लारला दिना २० मई' १९९९ रै दिन देवलोक हुयग्यो. आ जाण'र साहित जगत रा विद्वाना
नै घणो दुःख हुयो मौन तपसी री तांइ आप पूरे जलम साहित अर इतिहास री सेवा में जुट्या रया. इयाँ का प्रखर विद्वान री जाणकारी पाठकां नै भी हुवे अर बै पढ़'र प्रेरणा ले . इण वास्ते उंणा रो जीवन चरित्र लिख्यो जावे है.
साहित जगत मै मनीषी री उपाधि सूं सम्मानित स्व. सुरजनसिंह सेखावत रो जलम १० दिसम्बर '१९१० झुंझणू जिला रा नामी गाँव झाझड माँय हुयो.आपनै सुरु सुरु मे बरमचारी आसरम
नवलगढ़ में भणाई करी. ओ आसरम उण बख्त रो एहड़ो आसरम हो जठे संस्कारां री सिक्सा पर घणो ध्यान दियो जांवतो, ओ ही कारण हो कै आपरी वेसभूसा, आचार विचार अर चिंतन मनन
में भी भारत री संस्कृति री हिज सुगंध आवती. पछे आप १९३० में जैपर में रै'र दसवीं तक की भणाई करी. इण रै पाछे प्रथमा हिंदी प्रयाग सूं अर साहित भुसण री परीक्षा कासी सूं पास करी
युवापण सूं ही आप री साहित रै प्रति घणी रुचि रही. दुर्गा भगत बाघसिंह मुकन्दगढ़ रै नजदीक रेवणे सूं धरम रै प्रति आपरी आस्था और बढ़ी. आप भी सगती में आस्था राखता. सुरसत पूत चारणा
री वाणी सूं जद आप डिंगल रा गीत सुणता तो आप रै ह्रदय में भी वीर रस रो पोसण होतो.इणा रै संसर्ग सूं राजस्थानी साहित्य रै प्रति आप री रुचि और बढ़ी अर धीरे धीरे आप भी डिंगल रा
सोरठा व् दोहा रचण लाग्या.आप रा १९३० का लिख्या कई दूहा देख्या.उण बख्त देस प्रेम रो एक नमूनों पेस करूं:-
सहज प्रहरी हिंद रो, बणयो रह्यो हिमवान !
आक्रान्ता आड़ो बण्यो, राखी भारत स्यान !!
देव संजोग सूं आप उण बख्त खरवा चल्या गया. उण बख्त राव गोपालसिंह खरवा अंग्रेजां रै खिलाफ चालण हाली क्रांति मे सरीक हा. आप उणा के साथ रेवता .१९३४ में उणा रा दीवान मोडसिंह मायाला
देवलोक हुयगा तद आप महान क्रांतिकारी राव गोपाल सिंह रा निजी सचिव बणया.राव गोपालसिंह रै क्रांतिकारी विचारा री छाप आप पर पड़ी अर राव साहब भी आपरा कामा सूं प्रभावित हुया. उण
बख्त आप छाया री तरे राव सा'ब रै साथै रैंवता. उणा रै साथै रेवण सूं आप में भी क्रांतिकारी विचार पनप्या. उण बख्त आप राव गोपालसिंह खरवा री प्रसंशा में कई गीत दोहा अर सोरठा लिख्या:-
क्रांतिदूत गोपाल रो , खरवो थान महान !
नर नाहर थाहर दिपै , जंगो गढ़ जोधाण !!
गोरां नै ललकारिया ,निज भुज बल रै पाण !
१९३० सूं १९३४ रै बीच रा किं नमूना राख्या. इण सूं ठा पडे कै २२-२३ री उमर सूं ही आप साहित जगत में लीन हुयग्या हा.
साहितकार रै रूप में :
राजस्थानी रै साहित रै प्रति आपरो घणो रुझान रैयो. आप इण भासा रा घणा हेतालू हा. आप कैया कहता - राजस्थान रा इतिहास लिखणया जद तांइ राजस्थानी साहित नै न पढ़े उण
रो इतिहास सांचो इतिहास कोनी कहियो जा सकै, क्यों कै इतिहास रा मोती तो राजस्थानी साहित मै छिप्या पड्या है.
आप नै राजस्थानी साहित नै भणण अर लिखण रो सदा सूं ही चाव रै'यो .शुरु शुरु में आप जद सोरठा ,दूहा आदि लिख्या, राजस्थानी भासा मायं ही लिख्या अर ओ चाव आप रो ठेठ तांई
रै'यो. १९३० सूं हीज आप राजस्थानी सूं लगाव राख्यो . आप देस प्रेम रो साहित लिख्यो . ओ साहित पद्य व गद्य दोना में ही मिलै. १९३९ में जर्मनी अर अंग्रेजा रै बीच जंग छिड्यो उण बख्त भी
आप वीर रस पोसण रा दूहा सोरठा लिख्या :-
हुयो रास्टर निर्माण हित , नाजी दल मजबूत !
आयो योरप उपर , जरमन बण जमदूत !!
१९४८ में कबायला जद कसमिर पर हमलो बोल्यो जद भारत रा जवाना मुंह तोड़ जवाब दीन्यो अर उणा नै पाछा भगाया . उण बगत रा नामी वीर पीरु सिंह वीर जोधा री ज्यूँ भिड्या
अर सत्रुवा नै मारता काटता आगे बढया अर काम आया . भारत सरकार उणा नै परम वीर चक्र देर आप रो फर्ज निभायो. पिरुसिंह री वीरता पर आप री कलम चाली, उणा पर काफी कुछ लिख्यो
एक नमूनों परखो :-
टीथवाल रै मोरचे, समर हुयो घमसाण !
जूझ मुवो पीरु जठे, मही रो राख्यो मांण!
१९६२ में जद चीन आपणे देस पर हमलो बोल्यो भारत रा वीर बाहदुरी सूं लड्या. उण बगत भी राजस्थान रा वीरां राजस्थान री लाज राखी. राजस्थान रा वीर सैतान सिंह अनोखी
वीरता दिखाय अर सत्रुवा ने मोत रै घाट उतार'र रणभोम में काम आया . उणा नै भी भारत सरकार परमवीर चक्र रो सनमान दीन्यो. उण बख्त भी आप री कलम चुप कोनी ही .
सैतान सिंह री वीरता पर भी आप साहित लिख्यो :
मझ रण में पायो मरण , राखी रज री आण !
भीड़ बैरी जुध भागिया, रंग भाटी सैतान !!
आजादी तांई लड़णिया सुतंत्रता सेनाणिया पर भी आप री कलम चाली गाँधी , नेहरु आदि पर भी आप लिख्यो . नेहरूजी देवलोक हुयगा आप नै उणा री मौत रो धको लाग्यो
आप उणारा मरसिया ( पिछोला ) लिख्या :-
त्राता भारत भोम रो , भ्राता दीन जनान !
मानव अब ढूंढा कठे, नेहरु जस्यो महान !!
बीते सतक अनेक , न्र नामी निपजे धरा !
नेहरु सो कोई एक , जननी लाखां में जणे !!
राजस्थानी भासा में आप भगती , नीति आद संदर्भ रा दूहा सोरठा भी लिख्या :-
क्षण भंगुर इण देह रो , मोह करै सो मूढ़ !
जीव अमर अंस ईस रो , वरणो अरथ अगूढ़ !!
प्रारब्ध रा ऐ करम , अवस मेव भोगण पडे !
जो समझे ओ मरम , सुख दुःख नै सम जाणलै !!
आप रै संस्मरण में भी आप राजस्थानी भासा नै भूल्या कोनी पाछा री बाता याद करता लिखे :-
ताता चढ़ तुरंग , सूरां माथे दोड़ता !
बीत्या दिन बै रंग , अब पाछा नही आवसी !!
आप राजस्थान अर राजस्थानी साहित पर घणा शोध लेख भी लिख्या जो भोत सी पत्रिकावा में छपीज्या . आप रा अह्डा प्रमुख लेखां में राजस्थानी साहित में नीति बोध , कृपा राम खिडिया और उन की रचनाये
वित सारु दत बाँटज्यो, चबुकां तणी चोटा, डिंगल साहित्य रा एक झमालिया छन्द, राजस्थानी साहित्य में भक्ति रस और श्रीकृष्ण ,राजस्थानी दोहे ,राजरूपक ठाकरां सुजाण सिघ रो बारठ मेघराज रो कहियो -एक परिचय , राजस्थानी नारी ,शेखावाटी के इतिहासिक प्रवाद , राजस्थानी साहित्य में शक्ति , भुरजाल भुसण आदि गीणाया जा सके है.
इतिहासकार का रूप में
इतिहासकार का रूप में
सुरजनसिंह आपरै बखत रा नामी इतिहासकार रैया . आप री जितरी पैठ साहित में हीज उतनी हीज इतिहास में हीज. इतिहास रा पारखी पं. गोरीशंकर हिराचंद ओझा ,हरिविलास शारदा ,
डॉ. दशरथ शर्मा रै इतिहासां री आप पर घणी छाप पड़ी. शोधपरक इतिहास री कांई पिछाण होवै अ बातां आप इण इतिहासकारा री पोथ्याँ सूं सीखी अर सेखवाटी रै इतिहास पर कई पोथ्याँ
लिख'र शेखावाटी रो इतिहास उजागर करयो.आप री इतिहास री पोथ्याँ में ऊंड़ो चितन -मनन अर शोधपरक दृष्टी लखावे. १९७२ में जद आप सेखा पोथी लिखी तद सूं हीज म्हारो इण सूं
सम्पर्क जुड्यो. आप म्हने गुरु री तरियां हीज इतिहास लिखण रो मारग दिखायो जिण सूं मैं भी कीं लिखण रै जोग हुयो .आप री पैली पोथी 'राव शेखा ' १९७२ में छपी जिण नै कई विद्वाना
सराही. इणरै पाछे तो इण पोथी रा दो प्रकासण फेरूँ होयगा. इण पोथी मै शेखावाटी रा संस्थापक राव सेखा रो जीवन चरित लिखिज्यो .
इतिहास री आप री दूजी पोथी मांढण युद्ध छपीज्यो . आप इण रो संपादन करयो. १८३८ वि. में मिठूलाल री लिखी आ पोथी पुराणी लिखावट रै कारण
घणकरा लोगां सूं पढीजी ही कोनी. आप घणो सरम कर'र इण पोथी नै पढ़ी अर फेरूँ संपादन करयो .१८३२ वि. में मांढण नाम रै थान पर शेखावातां अर दिल्ली
रा शाही फौज रै बीच जबरदस्त जंग हुयो जिण रो सांगोपांग लेखो जोखो इण पोथी में मिले .
१९८४ में आपरो नवलगढ़ रो इतिहास छप्यो. सेखावाटी री भोत सी घटनांवां इण इतिहास रै पढ़ण सूं जाणी जा सकै है . १९८६ में आप री सोधपक इतिहास रीपोथी ( शेखावाटी प्रदेश का प्राचीन इतिहास ) छप्यो. आज तांई सेखावाटी रै पुराणे इतिहास पर अहेडी पोथी कोनी लिखिजी . आप समै री गहराई में गोता लगाय'र इतिहास रा मोती काढ'र आपरी इण पोथी रूपी माला में पिरोयो .
आपरी अगली पोथी राजा रायसल दरबारी १९९० में छपीजी खंडेला रा राजा रायसल दरबारी आप रै बखत रा ऊदभट्ट यौधाअर कूटनीति में प्रवीण हा .फारसी रीपोथ्याँ , राजस्थानी ख्यातां, कहावतां, बातां, फरमाना आदि रै आधार पर लिखी आ पोथी रायसल दरबारी रै पूरे चरित नै उजागर करै.
इण पोथी रै फेरूँ महान क्रांतिकारी राव गोपाल सिंह खरवा पर आप पोथी रची . खरवा ठिकाने में आप राव साब कने रैया , इतिहास मेंआँख्यां देखी बातां रै बराबर तो तो और कांई प्रमाणिक हुवे .
आपने राव सा'ब री घटनावां,उणारै जीवन रा करतब सै आँख्या देख्या. इण वास्ते आ पोथी तो अनूठी है ही .आ पोथी सिर्फ राव सा'ब रै चरित न ही उजागर कोनी करै उण बगत रा
भोत सा क्रांतिकारिय रै जीवन चरित न भी उजागर करे .केशरी सिंह बारहठ, प्रताप सिंह, जोरावर सिंह, विजय सिंह पथिक ,अर्जुन लाल सेठी , दामोदर राठी ,रास बिहारी बोस आदि
क्रांतिकारिया री चोखी जाणकारी इण पोथी सूं मिले . इण पोथी रो प्रकासन आयुवन स्मृति संसथान जयपुर १९९६ में करयो.
इण सूं पैली एक आपरी एक पोथी सेखावाटी रै शिलालेखा पर छपी. सेखावाटी रै इतिहास पर कलम चलाणिया लेखकां नै इण पोथी सूं घणी मदद मिलै. तीसरी सदी
बी. सी सूं लेर १६ वीं सदी तक रा शिलालेखा रो सम्पादन इण पोथी मै मिलै.
इतिहास री पोथ्याँ मै आप री आगली पोथी खरवा को इतिहास १९९८ मै छपी .आ पोथी खरवा रो इतिहास पाठकां रै सामने हाजिर करै . इतिहास री आगली पोथी 'खंडेला
ka वृहत इतिहास '१९९९ में छपी . आ पोथी शेखावाटी रै इतिहास रो एक खजानों कहियो जा सके है.
साहित्य जगत रा मनीषी सुरजन सिंह जी री साहित्य साधना और इतिहास री शोध कदै नी भुलाई जा सकै |
ReplyDeleteExcellent
ReplyDelete